Lou gran libre dóu Ciel n'ensegna de tout caire, 
Che cau suivre l'avis dóu paire e de la maire. 
Après l'aver dóu sieu laç ben nourrit 
La Cabra laissa un momen lou cabrit 
Dintre l'estable e ben lou serra : 
En dient, lou mieu bel enfan 
Ressouvene-ti ben ch'emau loup sian en gherra, 
E che cregni un sieu còu de man. 
Per degun non aussar la crica, 
E fai-lou coma lou ti dieu, 
Laissa picar se caucun pica, 
E non venir durbir ch'a jeu : 
A pena la cabra es partida, 
Ch'un loup, che près d'achi si tenia a l'escout, 
Vers l'estable non fa ch'un bout, 
E la cabra imitant lou beu cabrit envida 
A li durbir lou portissòu. 
Lou nourisson (souven en l'inoussensa 
Lou gran timour enfanta la prudensa) 
Per lou momen di che non pòu. 
L'uès au pertus, sepandan vòu 
Esaminar s'es sa maire la Cabra ; 
Ma ve lou loup che si leca li labra 
Cresent già segur lou sieu còu. 
Aloura lou cabrit repiglia 
Em'un ton inoussent e dous, 
De ma maire entendi la voux, 
Ma non veu pas li sieu faudiglia 
Pische non sies degun dei mieu 
Marcia per ton camin : adieu. 

Contra lou peril un bouon paire 
Es tougiou pront a n'avertir : 
Tantu che non l'escouton gaire 

Han souven luec de sen pentir . 

Joseph-Rosalinde RANCHER