Mi plas d'audi, vièii campana, 
Lu vouostre alegre terignoun 
Que, dintre l'aria diafana, 
Van semenant li siéu cansoun. 

Pèr lu batisme o pèr li festa, 
Vous demenas de bouon matin 
E lou picoun, jamai s'arrèsta 
De faire plòure lu tin-tin. 

Soubre lu mount e li planura, 
Couma'n vol d'auceloun lóugié, 
La vous armouniousa e pura 
S'escapa da toui lu clouquié. 

Ma quauquifes, o vous crudèla ! 
Lou vouostre tint es oudious 
Quoura, plegant la siéu parpella, 
Ven de mouri l'enfant jouious. 

Cantas ! cantas ! vièii campana, 
E que toujour, en plen azur, 
Si fasse audi la vous souvrana 
Ma pèr la pas e lou bouonur.

Jousè GIORDAN 
lu terignoun, 1914